नयाँ स्टक लाइसेन्सकाे हानथापले बाेर्ड अध्यक्ष नियुक्तिमा अन्याेल

नयाँ स्टक एक्सचेञ्जको लाइसेन्स हत्याउने विषयमा विचाैलिया दीपक भट्ट र आईएमई ग्रुपका अध्यक्ष चन्द्रप्रसाद ढकालबीच हानथाप हुँदा धिताेपत्र बोर्डको अध्यक्ष नियुक्ति अन्याेलमा परेकाे छ ।

नयाँ स्टक लाइसेन्स लिनकै लागि पावर ब्रोकरको रुपमा काम गर्दै आएका विचौलिया दीपक भट्टले यसअघि रमेश हमाललाई अध्यक्ष बनाएका थिए । तर, लाइसेन्सको विषयमा संसदीय समितिदेखि सर्वोच्च अदालतसम्म मुद्दा परेपछि हमालको कार्यकालमा भट्टको सपना पूरा हुन सकेन । भट्टले आफ्नो स्वार्थ अनुकुल हिमालयन स्टकलाई लाइसेन्स दिने प्रक्रिया अन्तिम चरणमा पुर्याए पनि त्यसले पूर्णता पाउन सकेन ।

नयाँ स्टक लाइसेन्स दिनका लागि ३ वटा कम्पनीको आवेदन परेको थियो । उक्त आवेदनको आधारमा तत्कालीन बोर्ड अध्यक्ष हमालले भट्टको हिमालयन स्टकलाई लाइसेन्स दिन चाहेका थिए । तर, आईएमई ग्रुपका अध्यक्ष ढकालले विरोध गरेपछि प्रधानमन्त्री पुष्पकमल दाहालले ठाडो हस्तक्षेप गरेर मन्त्रिपरिषदबाटै रोकिदिएका थिए ।

अहिले पनि नयाँ स्टकको लाइसेन्स हत्याउने खेलमा दीपक भट्ट जसरी पनि आफ्नो मान्छेलाई बोर्डको अध्यक्ष नियुक्त गर्न लागिपरेका छन् । उनले बोर्ड अध्यक्ष बनाउन आफ्नै कर्मचारी सन्तोष नारायण श्रेष्ठलाई पहिलो नम्बरमा अघि सारेका छन् । यसअघि बोर्डमा रहेर आफ्नो स्वार्थ अनुरुप काम गरेका कार्यकारी निर्देशक मुक्ति श्रेष्ठलाई अघि सारे पनि उनी विवादमा आएपछि अहिले सन्तोषकाे पक्षमा लबिङ गरिरहेका छन् ।

भट्टले गैर कानूनी काम गरेपछि प्रधानमन्त्री दाहाल रुष्ट हुँदै उनलाई बालुवाटार प्रवेशमै रोक लगाएका थिए । तर, भट्टले दाहालका ज्वाइँ जीवन आचार्यमार्फत सम्बन्ध सुधार गरेकाे बताइन्छ ।

भट्टले यसअघिको सरकारमा कांग्रेस नेत्री आरजु राणामार्फत् स्टक लाइसेन्स लिनका लागि प्रधानमन्त्री दाहाललाई दबाब दिएकाे र नयाँ समीकरणसँगै एमाले अध्यक्ष केपी ओलीसँग नजिकिएकाे बताइन्छ ।

यसअघि प्रधानमन्त्री नजिकका व्यक्तिले बोर्डकै कार्यकारी निर्देशक डा. नवराज अधिकारीलाई नियुक्त गर्ने प्रक्रिया अघि बढाए पनि भट्टले भाँडेकाे बाेर्डकै कर्मचारी बताउँछन् ।

अहिले विशेषगरी नयाँ स्टक लाइसेन्स लिनका लागि दीपक भट्ट र चन्द्रप्रसाद ढकालबीच कर्पोरेट वार परेको देखिन्छ । भट्टले सन्तोष र मुक्तिलाई बोकेका छन् । ढकालले भने बीमा प्राधिकरणका तत्कालिन अध्यक्ष चिरञ्जीवी चापागाईँलाई अघि सारेका छन् । अध्यक्ष छनौट सिफारिस समितिले पनि उनीहरुलाई ५ जना भित्र छनौट गरेकाे छ ।

बोर्डको अध्यक्ष सिफारिस समितिले कार्ययोजना पेश गरेको आधारमा आवेदन दिएका १९ जनामध्ये ५ जनाको नाम अन्तरवार्ताको लागि छनौट गरेको छ । जसमा श्रेष्ठ, चापागाईँसहित बोर्डकै कार्यबाहक अध्यक्ष डा. नवराज अधिकारी र नेपाल स्टक एक्सचेञ्जका प्रमुख कार्यकारी अधिकृत कृष्णबहादुर कार्की छन् । कार्की जनार्दन शर्मा अर्थमन्त्री हुँदा नेप्सेमा सीईओ बन्न सफल भएका थिए । धितोपत्र बोर्डमा २५ वर्षदेखि काम गर्दै आएका डा. अधिकारी यसअघि ४ पटकसम्म बोर्ड अध्यक्षका लागि छानिएका थिए ।